لفت أنظار الجميع داخل الساحة الكروية المصرية، وبعد صراعات طويلة بين
القطبين للحصول على خدماته، استقر به الحال للانتقال إلى المارد الأحمر في صفقة
انتقال حر، ترك سيد البلد وهو كابتن الفريق بعد أن انضم من خلاله لصفوف المنتخب
الوطني، وسريعًا ما تحولت هذه النجومية المتوهجة إلى الاختفاء منذ دخوله من بوابة
القلعة الحمراء، الجميع يرى أنه اللاعب الوحيد المظلوم داخل صفوف الفريق الأحمر،
خاصة وأنه الوحيد الذي لم يحصل على أي فرصة على مدار عامين، وحتى بعد تألقه في فترة
إعارة لمدة 6 أشهر مع فريق سموحة، ورغبة مسئولي الأهلي في عودة اللاعب عاد ولكن
بدون أي مشاركة أو فرصة أيضًا، إنه المظلوم محمد حمدي زكي الملقب بجدو الصغير في
حوار صريح جدًا يفتح قلبه لـ "البوابة سبورت".
في البداية ما هو تقييمك لتجربتك مع الأهلي؟
طبعًا، تجربة جيدة جدًا كللت مجهودي أيام الاتحاد السكندري ومن خلاله كنت في
منتخب مصر، وبالطبع كان ذلك حلمي أن ألعب في أكبر نادي في مصر، وكان نفسي يكبر اسمي
كمان وكمان من خلال اللعب والبطولات.
لكن أنا حزين لعدم حصولي على فرصة مثل باقي زملائي واعتبر أقل لاعب شارك في
المباريات و"مش عارف ليه بيحصل معايا أنا كده سنتين على التوالي".
كنت موجودا في المنتخب قبل الانضمام للأهلي وبعد الانتقال للقلعة الحمراء تم
استبعادك منه ما تفسيرك؟
طبعًا دي حاجة صدمتني جدًا أي نادي في مصر يتمنى يكون عنده لاعب في منتخب
مصر، والطبيعي أني أكمل مشواري في المنتخب والناس تساعدني علي كده لكن ما لقتش ظهر
ليا في الأهلي.
لو عاد بك الزمن ماذا كنت ستختار؟
لو رجع بي الزمن كنت هاختار الأهلي برضو عشان ما كنتش أعرف، المستقبل في
أيد ربنا هو العالم وده عرض عمري ما أي لاعب يقدر يرفضه طبعًا.
لكن لو كان الزمالك كلمني وخلص معايا قبل الأهلي، وأنا اتفقت عمري ماكنت
هرجع في كلامي معاهم عشان أنا بحترم نفسي وكلمتي سيف على رقبتي تجاه أي حد زي
بالظبط ما عملت مع الأهلي عندما فاوضني الزمالك وأنا كنت مخلص مع الأهلي.
حتى لو كنت تعرف أن نفس السيناريو الذي حدث معك "هو اللى هيحصل"؟
لو كنت أعرف السيناريو كنت أكيد هفكر في الموضوع، لكن لو كنت متأكد إني
سآخذ فرصتي كنت وافقت على الانضمام للأهلي مرة أخرى، لكن لو لم أحصل على فرصة للعلب
"تفرق طبعًا.
هناك أنباء تتحدث عن مفاوضات مع الزمالك، ما حقيقة ذلك؟
حاليًا لأ، لكن ممكن يحصل مع مرور الوقت.
و لو حسيت إني في الأهلي ماليش وجود وهما بايعيني أكيد هاوافق.
هل تغيير الأجهزة الفنية سبب فيما حدث معك؟
لأ طبعًا.. أنا اللي طلبت الإعارة لما لقيت اللى بيحصل وعرفت إني مهما عملت
مش هالعب، وكان لازم ألعب فخرجت، وربنا كرمني والمفروض أرجع ألعب لكن نفس اللي حصل
تكرر.
هل ترى أن إعارتك لسموحة كانت مفيدة خصوصًا إنك بعد العودة لم تشارك أيضًا؟
أكيد مفيدة جدًا وأهمها إني أكون في الملعب وعشان كده رجعوني لما قدمت
مستوي طيب.
لماذا رفضت عرض الإسماعيلي في الصيف واستجابت لنداء العودة للأهلي؟
مقدرش أتاخر عن الأهلي لو قال محتاجني، وده كان بعد ما كلموني علي طول
وقالولي أنت راجع وربنا يوفقك معانا السنة دي مع إني كنت عارف أنه هيحصل كده برضو بعد
ما رجعت علي طول، بتبان من طريقته وتعاملهم معاك بانت في التدريبات في المبارايات،
تحس أن ملكش وجود، محدش بيكلمك يقولك هتلعب ولا بيظهروا أي حاجة تجاهل تام، وبيبان
ده من خلال المباريات التدريبات مهما تتمرن مبتلعبش، وناس ممكن متتمرنش وتلعب عادي
وتدخل العشرين.
هل أثر ذلك على مستواك في التدريب ؟
لأ خالص بس أكيد أنا بشر ولازم أتخنق، ممكن أتمرن بشكل مش كويس يوم ولا
حاجة بسبب اللى بحس بي ولكن يرجع تاني وبارمي وراء ضهري.
هل اتظلمت في الأهلي؟أيوه طبعًا كل الناس شايفة كده أنا أكثر لاعب اتظلم عشان كده اتكلمت، ما أقدرش أشوف إني بتظلم وحقي بيروح وماتكلمش، ماجرمتش إني بقول عايز ألعب.
هل حصلت على مستحقاتك من الأهلي بشكل كامل؟
آه طبعًا، النادي الأهلي عمره ما أكل حق حد، حتى إلى بيمشي.
هل شعرت أن حسام البدري يكرهك؟
لأ مش كره خالص بس أكيد عليه ضغوطات كتير.
ما حقيقة هجومك على الجهاز الفني في الغرف المغلقة؟
أنا عمري ماهجمت أي مدرب.
من وجهة نظرك كيف للاعب جديد أن يجد لنفسه مكانًا في تشكيل الأهلي؟
لازم يكون جاي بفلوس كثير ده المعيار في الأهلي لو جاي بمبلغ قليل أو ببلاش عمره مهما قدم ما هيلعب.
ماذا عن مفاوضات أهلي طرابلس الليبي.. وإنبي؟
لسه في مفاوضات من الاثنين لكن اللعب لإنبي هو الأقرب بالنبسة لي.
وماذا لو عرض عليك العودة مرة أخرى؟
الاتحاد في ظل وجود الناس اللى فيه حاليًا لا، لكن ممكن في المستقبل.
هل تفكر في تجربة جديدة خارجية بعد ما تثبت نفسك في فترة الإعارة ؟
أنا مش محتاج أثبت نفسي أنا عارف نفسي الحمد لله كويس أوي وأكيد في يوم هلعب بره مصر.
هل شايف إن الأهلي مقبرة للنجوم؟
لأ هو مش مقبرة للناس اللى جايا بفلوس كتير لأنه لازم يلعب ولو لعب كويس بيكمل.
هل فعلا فانلة الأهلي تقيلة؟
أكيد تقيلة بس أنا محمد حمدي زكي، هي تقيلة بس علي الناس اللى ملعبتش في أي أندية كبيرة، اللى جاي من تحت يعني.
الأهلي أضاف لمحمد حمدي ولا خد منه؟
أضاف طبعًا كتير أوي اسم النادي الأهلي لوحده بطولة، بس خد مني حاجة كبيرة أوي، إني ملعبتش تاني وإني أخرج من منتخب مصر اللي كنت بحارب عشان أدخله.
هل ستعود لسابق مستواك؟
والله أنا مش شايف أن حد هيعمل أكتر من اللى أنا عملته مش كوره بس طبعًا، أنا لسه معملتش حاجة في الكورة، لكن بتكلم إني كنت في المنتخب ومكسر الدنيا السنة اللي قبلها وملعبتش برضو، لكن الشيخ لعيب كبير وإمكانياته عالية جدًا ويستحق أنه يلعب في الأهلي، وأتمني أنه يكون موجود ويلعب كمان في منتخب مصر.
إيه رأيك في المنتخب؟
أتمنى نكسب بطولة أفريقيا.
شايف الدوري إزاي؟
طبعًا لسه بدري جدًا لكن أتمنى الأهلي يحصل عليه إن شاء الله.
مين اللاعب اللى تتمنى تلعب معاه؟
محمد أبو تريكة طبعًا ومحمد بركات اللى باعتبره مثلي الأعلى.
ما هو النادي واللاعب المفضل على المستوى الأوروبي؟
ريال مدريد وكرستيانو رونالدو.
ما هي هوايتك المفضلة بعيدًا عن الكورة؟
هوايتي الكرة فقط.
من هو نجمك المفضل سواء في التمثيل أو المطربين؟
أحب كثير جدًا أحمد السقا ومحمد رمضان ومحمد عادل أمام وحسن الرداد وما باسمعش أغاني.
مين سبب تسميتك جدو الصغير؟
أحمد حجازي.
في النهاية تحب تقول أي حاجة؟
بالنسبة للي بيصطاد في الميَّه العكرة أحب أقوله إنه مش هيعرف يوقعني في غلط مع جمهور النادي الأهلي ولا النادي الأهلي، أنا ما أجرمتش إني عايز ألعب ومش عايز أقعد علي الدكة، وأنا فعلًا لو قولت أنا مش موظف كان إيه رد فعلهم، هو أنا لو طلبت ألعب يبقى بيتنطط ولو مطلبتش تقول عليا موظف وإنك معندكش طموح والكلام ده حقيقي فعلًا حاجة غريبة.
