ابسط يا عم المحدود ، زغرطي يا محدودة ، الفرج بيخبط ع بابكو يا متاعيس ، عاوزين خروف للعيد ؟؟ .. غالي والطلب رخيص وكمان بالتقسيط ، شايف البقال اللي هناك ده ؟ عليه دوغري ، ما تبصش وراك ، ادخل وإرمي المسا واطلب بأدب وإيديك في جنبك : ممكن خروف ، من فضلك عاوزه بحالة جيدة ، حسن المظهر ، يقدس الحياة المنزلية ، مأصل ، ويرغب ف الدبح ، بس كده ، ولا كلمة تاني ، وده كل الموضوع ، هتغرم مشوار وتجهز خمسين تمنين تسعين جنيه بالكتير أوي ، وهتجيب خروف العيد وبالتقسيط ليك وللعيال وهتيص وتهيص يا محدود ، مش قولتك : حكومة بنت ناس كويسين ، حاسة ، وشايفة ، ولمسة ، وناظرة تعب البلاد وطلوع روح العباد ، وادعولها : « إلهي يطلع روحك يابعيدة » .
