الحب اللي إنتَ بتحلم بيه هيتحقق لما تكون مُستعد له الاستعداد في حد ذاته دليل على القوة - القوة الفكرية -، علشان تفتح باب الحُب لازم تكون قوي فكرياً؛ لأن الحب مابيستمرش بالكلام ولكنه يستمر بصدق إحساسك علشان كلامك يوصل، وأهم ما في الحُب (الثقة)
البعض بيتمنى يرتبط ببنت جميلة.. لكن جمال بدون تفكير ماينفعش.. متخليش حلمك يرتبط فقط بالجمال لأن جمال الجسم له مدة معينة وينتهي لكن جمال الروح بيفضل للنهاية
الحب زي الوردة لو كتر الشوك اللي فيها هتجرحنا وهنخاف نقرّب منها علشان مانتلسعش، لكن لو قاومنا هنقرّب ومش هيهمنا حاجة.. الحب قوة بتكبر لما نقرر إنِنّا نساعد بعض، و في الأول و الآخر الحب رزق استناه وماتستعجلش
هقولك نصيحة جايز تنفعك وجايز تاخدها من هنا وماتفكرش فيها بس حاول تعتبرها رسالة اتكتبت مخصوص علشانك إنتَ.. علشان تحب لازم تكون قد مفهوم الحب، الحب مش خروجة حلوة أو كلمتين من كلام الأغاني. الحب مسئولية.. كلمة بحبك لوحدها مسئولية مِش معنى إنك تقولها (بحبك، بموت فيكي) يبقى كده إنتَ عايش قصة حُب.. قصص الحب بتحتاج لـ مغامرة وذكاء وثقة وقلب يحب بصدق.. كده هتحس إن حياتك فعلاً ليها معنى وحياة الإنسانة اللي إنتَ بتحبها بدأت تكمل حياتك وهتحس بمفهوم الحب
صدقني مهما حاولت تقرب من كل بنت جميلة تشوفها، مش هاتكسب حاجة غير إنك هتخسر قلبك، حافظ على قلبك علشان يكسب قلب طيب يحقق معاه كل أحلامه.. قلب كل طموحه إنه يسعدك.. ماتنساش حاجة مهمة جداً (كما تدين تدان) فحافظ على قلبك منك
الحب روح بتشد روح لطريق "الجنّة"، الحب إنك ماتحسسنيش بالنقص، الحب إني ألاقي كل حاجة ناقصاني فيك.. الحب مش مجرد كلمة، الحب أكبر بكتير من إنك تعبّر عنه بكلام.. باختصار الحب "جنّة".
