تعرف الجدع ده فشار من عدمه إزاي ؟؟ الحكاية بسيطة .. الدكتور ممدوح شكمان أستاذ جراحة الفشر والترقيع ، أعد دراسة لولبية ف الحتة دي .. قال شكمان : ست صفات للشخص الفشار .. كتير الضحك والسخسة على الفاض والمليان .. نصاب .. ملاوع .. فوريجي .. بصباص .. له في سكة السياسة والـ 3 ورقات .. استشهد الدكتور شكمان ب " رجل الاعمال الكبير أوي حسين سالم " كعينة نتة في دراسته المحورية .. كشف شكمان أن كل الصفات جات على مقاس سالم .. دلل شكمان بتصريحات جنابة عن ثرواته ومدخراته ومهرباته وحبه الوهم للغالية مصر .. أوضح الدكتور شكمان زميل الكلية البريطانية للفشر ، أن سالم بسلامته كان على استعداد أن يدفع كل فلوسة ودنانيره .. آه كل دنانيره مقابل البراءة .. رجع العرض خطوتين تلاته إلى النصف .. بعد البراءة .. لحس سالم كلامه .. لا طالت مصر النص ولا شافت الربع .. ردد سالم في وسائل الإعلام: "مين آل الكلام الأهبل ده.. اتبرع بنص ثروتي لمصر .. طب ليه ..؟؟ " .. " سالم ابن أم سالم " بحسب تحليل الدكتور شكمان ، ناكر للجميل .. جحود للماما "مصر" إلى أبعد حد وجسر .. مراوغ من زمن فات .. تربى في مستنقع الفساد والتضليل والتطبيل واللعب بالألفاظ .. شرب إزاي وإمتي يكون "حويط ولئيم وخبيث و فشار كبييييييير " .. م الأخر والعهدة علي الدكتور شكمان : " الشاب سالم غلب الجدع أبو لمعة يا رجااااالة " .
