كل واحد فينا عنده إمكانيات وطاقات داخلية تخليه شخصية مؤثرة وفعالة في المجتمع... الموضوع كله تعرف أنت متميز في إيه وتحاول..... تكبره وتنميه... وياريت تفهموا كلامي صح وميبقاش في سوء نيه في الموضوع .. فيه حاجات ممكن تبقي عندك ومش عند غيرك...حاجات بسيطه جدا وتافهة بس تكون سبب في نجاحك من وجهة نظر بعض الناس ممكن تكون شاب بتلبس بنطلونات حمرا ضيقة وباديهات سبعة كارينا ومسقط البنطلون ... والناس تبصلك باحتقار وتبقى شايفاك عيل غلط .. في حين إنك لو كملت في الطريق ده وتميزت فيه ممكن في يوم من الأيام... تقدم برنامج على التليفزيون المصري زي الأستاذ شريف مدكور .. ممكن تبقي تخين جدا والناس بتقولك خس... وأعمل دايت..في حين عندك الأستاذ عماد أديب والأستاذ معتز الدمرداش...رموا كلام الناس ورا ضهرهم وكملوا في اللي هما فيه لحد مابقوا نجوم التوك شو.. متهتمش بكلام الناس يمكن كرشك يكون ميزتك.... يديك ثقل قدام الناس وهيبة عمرك ماهتوصلها لو كنت رفيع .. ممكن تبقى شاب لسانه طويل زى أي شاب في مصر واخد الموضوع هواية...في حين إنك لو تميزت فيه وابدعت ممكن تبقي زي الأستاذ مرتضى مندور ... بتطلع على كل التليفزيونات... وماسكلك إدارة نادي أو اتنين وبتشتم في أحمد شوبير برضه عادي يعني .. ممكن نبرة صوتك المسرسعة تبقى سر شهرتك.... وتبقى إعلامي كبير زي الأستاذ أحمد موسى .. ممكن بسشوار كويس... وعلبة ماكياج محترمة على شوية تمثيل تبقى مذيعة.... زي ريهام سعيد .. ممكن لو معاك قرشين تنتج فيلم لراقصة جديدة وتبقى منتج كبير وتتحكم في سوق السينما المصرية... زي الأستاذ السبكي .
