قررررب .. احجز كرسي ف البرلمان .. زحمة ف الأحزاب .. اجتماعات وهمس وغمز ولمس .. قاعدات مكشوفة وسرية وتربيطات مع قايمة فلاني وقايمة علاني .. الوقت أزف يا جماعة .. الانتخابات ع الأبواب .. ترقب كبير وطويل من المشتقاين للعودة للضوء وحذر من مجموعة البيزنس .. ودايما السؤال الصعب والغامض والمعقد واللغز والفزورة : "إيه غية رجال المال في دخول البرلمان والقفز على كرسي من كراسيه؟" .. واحد محترم يرد: واضحة العملية .. علشان البزنس وضهر جامد لفلوسهم وملياراتهم" .. وأضيف للمحترم نقطة مهمة: "وحصانة كمان من خلالها يلبس الواحد منهم طاقية الإخفا ويفك هربا خارج البلاد في حالة نهب بنك كبير عبر قرض ضخم أو توريطة علي غفله" .. رجال الأعمال ويا حفيظ، مستموتين موت في المعركة الجاية وحالفين ألف يمين وبالغالي وتراب البلد أن الفرصة لن تفلت منهم وداخلين المجلس .. داخلين .. قناعتهم : "الجنيه غلب الكارنيه وبفلوسك هتاخد الكحل من العين" .. وعلي هذا اجتمعوا علي قلب رجل واحد في جلسات مصغرة طوال الليالي اللي فاتت " فين .. فين .. الله اعلم .. بس أكيد في خُن من إياهم " ، وصوتوا علي وضع خطة حرب واضحة ومحددة تستهدف السيطرة علي البرلمان ، تقضي في الانتشار بالدوائر المختلفة بالتركيزعلي الفقيرة منها ورصد كام شيكارة فلوس لزوم لم الاصوات وزغللة العنين والبطون الجعانه " سموها شرا أصوات .. سموها .. سموها طريقة مشبوهة ورخيصة للفوز بكرسي برلماني .. سموها " .. المهم بحسب فلسفة هؤلاء البعدا : " اللي تغلب به ألعب به".
